Luk 8 | BEF | STEP | Aliha'a nesi'a minoto Yesu sipi hepa'ifi to lagaso hepa'i ninalo ninalo bula ola huto Hu'mamofihi kapo'amofihi hetofa kaga'a boana'i enalitoga lu epimofa'na hu'ehina yabe. To nayahi luga luga su hoto nigigusagati loemo heleko malago hite Yesuhi koko pana'a minana mege'i melete bi'ahana yabe.

Luke 8

Ana'i luga'a Yesuhi mege'i melete kapo mele'ahana yabe

1 Aliha'a nesi'a minoto Yesu sipi hepa'ifi to lagaso hepa'i ninalo ninalo bula ola huto Hu'mamofihi kapo'amofihi hetofa kaga'a boana'i enalitoga lu epimofa'na hu'ehina yabe. To nayahi luga luga su hoto nigigusagati loemo heleko malago hite Yesuhi koko pana'a minana mege'i melete bi'ahana yabe. 2 To ana huto ana'i luga'a Yesu enebesise'nafi to foipa fele li he'mi epalana mege'i melete bi'ahana yabe. To analuguti moneya Maliau yabai Magatala hepalo a'i yabe lite gi'a helata hana ailuguti koyapa'i Yesu foipa fele nayahi mone kegi'a su huto mone kegi'ati loemo heleko malago li he'mi eto'ehina yabe. 3 To Yoana, Susahi liha'a ai Helotihi noha'alo kaba bomofihi liha'a yagi to Susana to babu ana'i luga'a hiti enali Yesu hiti to koko panana'amagihi fe'noha'anilo enehe'ma enehe'ma hite bi'ahana yabe.

Bo moneuba nose'na biha'a tili hu'ehinamofihi bame ka'a

Mt 13:1-9; Mk 4:1-9

4 Boana'i hepato hepatoti Yesutoga eba eba hite ete babu lite li nupa hago Yesu ya'ma bame ka mone ma luto lu epi'ehina yabe: 5 Bo moneuba nose'na bigaha'a foya'agu buto hekalalube luto bu'ehina yabe. Ana nose'na bigaha'a li futili katili huto nohekalago luga'a kapogu limo koko hu'ehigo bona'magi enigigusatu'i i emagu mele'ahago namamagi fite ne'ahana yabe. 6 Luga'a efahubago hina melugu limo ito i polo huto hofa toto linaya me'i nogoya'a meni'igo hosopa ito logo bibe. 7 Luga'a nose'na biha'a ana huto ufeha'a hiti nina naga'i hapa'agu limo iloto polo huto nala'a hiti moneka hofa tete ti'ina ai ufeha'a hiti nagauba i etago ti bati mehu'ehina yabe. 8 To luga'a me'i nogoya hiti bati huto ninalo limo ina bati huto polo felana hofa toloto nose'na legeya'a babu luto legeya ho'ehina yabe. To Yesu molo emiloto ma luto lu epi'ehina: Kehelilo. Lenekesa ni'inogomo ya'ma ka keheliya ilo.

Yesu bame ka linamofihi hapa'a

Mt 13:10-17; Mk 4:10-12

9 Yesuhi koko pana'amagi ana bame kamofihi hapa lu limibo lite Yesuhi loka he'ahana yabe. 10 Ya hite loka nehago Yesu ma luto lu epi'ehina: Hu'mau ai'a suguna ka hapa'a alu lepi'ehibe. Ya hu'ehina luga'a boana'i enali bame kagutiko lu noepune ya hulenogo enali gili gili hilete be megalabe to enekesatu'i keheli lanaya ka mana melilana'mu yabe.

Yesu nose'na biha'a tili hu'ehina bame ka'a lu yege ho'ehina

Mt 13:18-23; Mk 4:13-20

11 Bame kamofihi hapa ma huto ni'ibe. Nose'na biha'amoya Hu'mamofihi kaga'a yabe. 12 Nose'na biha'a kapogu limo inamoya ma huto ni'ibe. Bona'magi kaga mana'a kehelilago analo Satau oto ana kaga komopa'aniguti lito bufa nohibe. To ana kaga kehelite komopa'anigu li melelete bite Hu'mau enubuto bilenogo ai'a kapo bati'alo mine lalabe luto yabe. 13 To nose'na biha'a efahubago hina melugu liminamoya ma huto ni'igi bona'i luga'amagi Hu'mamofihi kaga'mu enegelo bite nelibe. Ya nehana ana mono ka komopa'anigu fulu tuto emagu menominabe, enali nesi kana'asi komopa'anigu li melelete nehite fi taga huse'na huto nohigomo mele'isi ho kete ana kaga he'mi su helata nehabe. 14 To ufehe naga'i hapa'agu limo ina nose'na biha'amoya ma huto hapa'a ni'igi bona'i enali kaga kehelilata nehabe ya nehana enelesa luse'na to yogo fe'nohi bati'amu to enegelonaguti ma melugu minose'nauba neminanalo komopa'anigu bai toto minoto ka mana'a kehelinamofihi le'mo emagu mololago nose'na biha'a mana'a enaliluguti huto hulata menohibe. 15 To nose'na biha'a me'i bati huto nogoya'a ninalo limo ito bati huto tinamofihi hapa'a ma huto ni'ibe, bona'i enali ka keheli ule'ale hite lilete amuya melete minago enaliluguti nose'na biha'a huto huba huba hulata nohibe, Yesu ya lu'ehina yabe.

Libi'i ligito lapetu ifi tose'i

Mk 4:21-25

16 To mone ka hiti ma lu'ehina: Bona'magi libi'i ligite lapetu'i ifi tela to sipa kapoluga melelata menehabe. Hitalo nemalana yabe. To libi'i ya huto'i mele'ahago besa besa nolago bona'i ana logo fana meto be gelete bila ela hite minelata nehabe. 17 Asaga'na fala kito ninana alihi ai hepa'i kugumato huto hilina'mu yabe. Asaga'na bona'magi ifi togo ninana alihi ai hepa'i kugumato huto hulago logo fana meha'alo huto hulata nohibe.

18 Yana'mu lenali kaba hu bati hilo. Lenali kaga keheli bati hilanamo'mu nolube. To bo moneuba kehelise'na lilana Hu'mau ai mone'a hiti babu lito emilina'mu yabe. To bo moneuba kehelise'na melise fa'mene nohilina yalo ai kehelise'na mone ali'ohube luto ekesa noyigilina Hu'mau li he'milina'mu yabe.

Yesuhi ito'afu to gonamu tamu'agi

Mt 12:46-50; Mk 3:31-35

19 Yesuhi ito'afu to gonamu tamu'a aitoga anamo babu bona'magi le'mo bego hi'ahago enali Yesuhi bu'alo mebi'ahana yabe. 20 Ya hite nehago mone kene'uba bu enogoloto Yesuhi kehe i emito lu'ehina: Kai itokafumo to kogonamu tamukamomagi bu kagalune lite ma fegutoga ho tilete nehabe. 21 Ya noligo Yesu ma luto asaga'i lu epi'ehina: Enali Hu'mamofihi ka'a kehelilete mege'i nemalana boana'magiya nani ito'nigi nogonamu tamu'ni nehabe.

Yesu sipi habahi lu emigo felele hu'ehina

Mt 8:23-27; Mk 4:35-41

22 Mone yupahi Yesu koko pana'a hiti botigu tilete ma luto lu epi'ehina: Ma hefuhu nagamilugu ilaga huto muya beletoga bilune, luto lu epi'ehina. Enali hapi fite ana hefunugu boti'anigu bi'ahana. 23 Boti nagamilugu nobigo Yesu bu'i ko'ehina. Ya hu'ehigo amuya habahi hefupoguti liloto nagami'mouba boti'animogu ti bai tose'na huloto nagami hefunugu enele'mo ifi talina'a hu'ehina. 24 Yesuhi koko pana'a enelesa ligo bite Yesuhi le'mo ho tilete ma lite li'ahana: Sipi Bo. Sipi Bo yale. Lali ana'asi fililuta suhi nohibe lite li'ahana. Yesu bu'i ko'ehinati ho tiloto ana sipi amuya habapofi hiti to nagami'i bilina hiti ka etemekito kaga lu etimigo analo mele'isi felele huto bu'ehina. 25 Ya huto felele hulago Yesu ma luto koko panana'a lu epi'ehina: Lenali keheli ule'ale hise'natini hiya'a ni'ibe? Ya ligo enali enekesa yigi babu lite sipi enelesa'ani ligo enali ai lu emigo ai lu emigo hilete ma lite li'ahana: Ya'ma bo kiyi'afu nohibe? Ai nagami'i nobilinamofihifi to sipi habapofihifi kaga lu epigo enali ka'a keheli emina bo yabe lite enali'ani lugo keheligo hi'ahana yabe.

Yesu foipa fele negibe mone'mofinuguti li he'mi'ehina

Mt 8:28-34; Mk 5:1-20

26 Alihi enali he'mite boti'anigu bite Gegese hepato Galili hefuhu nagami muya beleto kegi'a ni'igo bi'ahana. 27 Yesu botiguti heleko limito nagami kehetoga gigusa notigo bo mone foipa fele ailuga nina ana hepatoti Yesutoga o'ehina yabe. Ana bo koyapa'i gufa'alo gukete'a mehepise gufa yapako kifi kifi kene mala mala hepa'i ninalo bula ola huto muli'mogu minolata nohina bo yabe. 28 Ai Yesuhi bu goloto sipi kehe iloto okabagati ifi toto Yesuhi gigusagu hekili higo koloto sipi kehe ito ma luto lu'ehina: Yesuo, kai ifo muya kokulumalugu Bo Hu'mamofihi Pana'a. Kai hena suhi hu netalube'mu nohane? Ke, kai nagabu gise'na li nugufalo memolobo, luto Yesuhi kehe ito lu emi'ehina yabe. 29 Yesu yata'a foipa fele komopa'aguti li he'mi etana molo nokehelito kehe i'ehina. Babu yupahi ya'mana foipa feleuba ana bo li sa gilago to bona'magi gigusa yapolo naga'i gi pili ko ete'ahana'mu i pulu tigo ka melugu le'moto bulata nohina yabe. 30 Yesu ana bo loka ho'ehina: Kigika gi'aga nohane? Ya ligo ana bouba lu'ehina: Nani nigi'ni yege yegeloita yabe. Hena'mugope babu foipa fele ailuguti bai tete mine'ahana. 31 Foipa fele enali ana bomofinugu bai tete minana Yesuhi kehe i emite li'ahana: Kai yatama keligu lele'mo memolobo, lite buka tite li'ahana.

32 Analo afehi lapaluga yaga babu lite nose'na'ani line mane hite foipa felemagi Yesu kumu yagamagi enugufagu lele'mo molobo lago Yesu bilo luto enoho lifi'ehina yabe. 33 Ya higo enali ana foipa fele ana bomofihi gufaguti he'mite yagamagi enugufagu tite falago ana yaga enali asaga'i yabatoga limilete bite hefunugu nofu ti su he'ahana yabe.

34 Ya hago yaga kaba bomagi anana huto hinana bu gelete asaga boana'i ya hu'ehibe lite lu epimofa'na ana hepato hila to yaga kaba nehana hepato hi'ahana yabe. 35 Babu boana'i hena suhi hu'ehifi lite bu galune lite bi'ahana. Enali Yesu nohinalo elete ana bo gufaguti foipa fele heleko limi'ahana gufalo gukete li hekololoto ekesa'a hokolo nohigo Yesuhi gigusagu nominana ana boana'i bu gelete enelesa'ani ligo koli hi'ahana yabe. 36 Bona'i luga'a enali ana huto hinana bu gete minanamagi kaga beto hite luga'a bona'magi ya huto ana bo negi noto nominanamo Yesu oto le'mo bati hu'ehibe lite lu epi'ahana. 37 Ya hago babu boana'i Gegese hepatoti ete li nupa hite minanamagi Yesuhi: Bufa hubo lite li'ahana, lali sipi lelesati nolibe li'ahana yabe. Ya lite lago Yesu botigu tito he'mi epoloto bufa hu'ehina yabe. 38 Ana bo gufaguti foipa fele Yesu li he'mi etana bouba Yesu kumu: Nani hiti bilu'ibe luto mege'i lifito nobinamo Yesu aku'i ho lifi he'miloto ma luto lu emi'ehina: 39 Hepakaga buto Hu'mau kele'mo bati hu'ehinana'mu bona'i lu epimofa'na hubo. Ya ligo ana bo hepa'alo buloto asaga boana'i ana kegi'a neminana Yesu le'mo bati hu'ehina kaga lu epi baga i'ehina yabe.

Yailusi to a'i mone Yesuhi kefe'alo bako hu'ehina a'i

Mt 9:18-26; Mk 5:21-43

40 Yesu nagami hefuhi mula kegi'a nina hepato henetigo babu boana'i li nupa hite geba hite nehanati be gelete hetofana huto ane lite sipi fokehi he'ahana. 41 Bo mone gi'a Yailusi yabe luto nohina bo ai mono noto kaba nohina bo heneti'ehina yabe. Ya huloto ana bouba Yesuhi gigusagu ho koto koloto: Kai hiti nani hiti nani nonuga bilu'ibe luto Yesuhi loka ho'ehinagi 42 yege pa'a mone'isi besito filise'na nohigo bilu'ibe luto loka ho'ehina. Ana pa'i nayahi luga luga su hoto mone kegi'ati loemo heleko malago kufu'a bu'ehina.

Yesu kapo moloto nobigo babu bona'magi le'mo folaganugu melelete luga lugati peninite nebago bu'ehina yabe. 43 A'i mone mino'ehina asaga yupahi golaha'a he'miba he'miba huto minago kufu'a nayahi luga luga su hoto mone kegi'ati loemo heleko malago minoto asaga yogo fe'noha'a lusa gi etana bona'magi epi su hana mone ana lusa bona'magi nobesinana li felele mehi'ahana yabe. 44 Ai ana a'uba babu bona'magi Yesuhi le'mo bego hite minanalo tiloto Yesuhi megesalo oloto kefe'alo ana a'uba bako higo nobesinana mele'isi felele hu eto'ehina. 45 Ya higo Yesu: Nugufalo kuyu'afu bako nohibe luto asaga bona'i enoloka hago enali ya mehu'ohune lite bahane nehago Pitau ma luto lu emi'ehina: Kaba bo'ni babu boana'magi kele'mo bego hi'ahabe. Henabe luto bahane halube? 46 Aku Yesu lu'ehina: Mone kene'uba kefe'nilo bako higo amuya'ni he'mi netoto nobigo molo nokehelito nolube lu'ehina. 47 Ana a'mouba Yesuhi gufalo linanamo'mu le'mo huto hilago keheliloto ai asaga bona'magi enubulo tubuto Yesuhi gigusagu hekili higo koloto asaga bona enogoko bilo Yesuhi gufalo bako hu'ehina kaga hapa'a lu noemito to yana higo nobesinana mele'isi i saki tuto felele hu eto'ehinamo hiti lu hokolo huto lu emi'ehina. 48 Yesu lu emi'ehina: Pa'nimaka kaika kaga keheli ule'ale huto minose'nakauba kele'mo ye nokabe. Kai nobitogo kipaka fulu hino.

49 Ana kaga Yesu lu su meho'ehigo bo mone kaba bomofihi nonugati kaga lito oto pakamo filibe luto Yailusihi lu noemito ana'a hiligi yabe luto tisa bo le'mo he'mibo luto lu'ehina. 50 Yesu kaga'atiti akeheliloto Yailusihi ma luto lu emi'ehina: Kai koli mehuse nohutoka, pa'i nohibe luto kehelito kaga'ni li pili ko minetogo ai aku'i buna salina'mu yabe. 51 Yesu ana bomofihi noha'alo henetiloto asaga bona'i fegutoga nehago Pitagi Yonigi to Yemesigi enali hiti enele'mago hiti to ana pa'mofihi ito'afugo afo'afugo hiti ti'ahana. 52 Asaga bona'i analo minana ana pa'mofi kumu lite nose'na mo site yibi hiba hiba hite nehago Yesu bu goloto ma luto lu epi'ehina: Lenali yibi nama mehilo. Ma pa'i mefili'ehina fa'mene bu'i ko'ehibe. 53 Ya nohigo asaga bona'magi enali afili'ehinaguti hena huto aku'i ho tiligo nolibe lite Yesuhi kiya hi ete'ahana yabe. 54 Yesu ana pa'mofihi yaha'alo liloto kehe i emito lu'ehina: Ma pa'i kai ho tibo. 55 Ya ligo ana pa'mofihi meha'a i behe huto ago ai mele'isi ho tito bu'i gili higo Yesu nose'na ite ete eminogo neno luto lu epi'ehina. 56 To ana pa'mofihi ito'afugo afo'afugo topa helete etelesa'atiti ligo Yesu ma luto etegekesa bi'ehina: Letali ma huto hinanamofihi hapa'a bona'i lu meepiliyo luto lu etoto'ehina.